S.L.I.D.E.S.H.O.W

SeTeLaH KePaHiTaN PaSTi AkaN aDa KeMaNiSaN

mY GueStBooK

Anak bujang mami~

Si Manja mami..

My Favourite Songs

Gurindam Jiwa...

Adorable...

Beauty TiPs

Macam siok rasanya malam ani semangat esok stat puasa. Mami sembahyang terawih bawa danish. Adib wit his dad. Mami kan sembahyang terawih di masjid katimahar tapi mami malam ani ke lambak liat persiapan puasa. Mami sampat buka cucul n spotlite dikulapis, biar cahaya terang. Dilambak, babu sibuk menyediakan makan malam before kami semua kemasjid. Wow ada umai, ada acar nyaman tah makan mami. Nah...camana mami kan lose weight ni, nini masak nyaman nyaman hehehe. Habis mamam n sembahyang maghrib, mami bersiap siap bawa bag bakul isi tikar sembahyang, kain telekong n stokin. Telekong andang mami pakai awal. Wah,..sambutan first day terawih memang lah...full parking sampai keluar jalan. Mami nda mau mau memajal jua kan paking ampir, jangan harap. I wish, setiap malam meriah macamani, kan siuk. Jangan karang sudah separuh puasa, dui kurang tia jemaah ah. palagi pada 7 malam terakhir, bukannya ingau malam lailatul Qadar tapi jadi malam lailatul kadai hahaha. Biasalah, sibuk mengusai rumah, bepikir apa patut ditambah. Kek n biskut siap kah udah, baju kurung takut nda siap manalagi kan di ubah suai. Pas tu bepikir, hariraya keberapa kan open house ani?. 2 kali ni kan open house, skali khas tuk peradian, patuan, cuzen. Skali lagi tuk frens hehehe. Kasian, dari dulu udah bisdia ani kan beraya dikulapis, bah insyaallah. Eh, kedangaran babu bangun kedapur menyediakan sahur. Apa babu masak ah?. Cerita pasal sungkai lagi. Dulu membali penyungkaian di gerai gerai ramadhan. Masani restoran sudah berakal, masing masing belumba lumba offer sungkai buffet murah, ada yang $6 per head, ada yang $5 per head. Kanak kanak murah lagi daripada atu. Hai, alamat bersih nda berasap dapur ni...Kadang boring jua makan direstoran. Ingin jua merasa masakan simple ie. lauk berabus, telor masin hehehe. K salam ramadhan tuk semua!!. Semoga kitani beroleh rahmat dan keberkatan darinya jua..Amin.

Ramadhan bulan kerinduan. Sudah lama mami tunggu kan bertarawih malam berkumpul makan sama sama masa sungkai hehehe teringat mami zaman kanak kanak dulu, nini bangunkan subuh tuk makan sahur tapi mata mami masih mengantuk jadi sambung lagi tidur dimeja makan padahal makanan sudah tersedia dapan mata. Siang berlapar menyesal nda makan sahur tapi ditahankan jua malu sendiri punya pasal. Time kan sungkai atu yang siuk sibuk minta balikan makanan tais liur kan makan itu ini semua kan mau. Nya orang iatah liur puasa tu. masa sungkai banar banar makan sudah atu 'kebungkayangan' nah kan sembahyang maghrib pun barat baratan palagi sembahyang terawih. Habis nunggu bis nini sama bis babu terawih, kami ramai ramai bekumpul tuk betedarus. Kedangaran mulah nini melagau mami adiberadi mengarahkan suruh sediakan alquran dan riyal (alas quran). Bah urak tikar betadarus tah kitani,.....Yati! zam! na! ada udah bis kajah linah mu bis ka bini, ka dk raimah, dk ramnah tu?.. sibuk tah nini tu sambil menyediakan makanan minuman tuk bis kami yang kan betadarus ani. Koktel, cincau, cindul, air puspa menjadi satu kemestian mesti ada hehehe. Time makan bah sibuk tah kami tu adi beradi n sepupu sepupu 'gaplah' baibun nda jauh kadang becakal jua hehehe. Mulah nini, i really rally miss u.......'alfatihah' tuk niniku tercinta. Sebak rasa hati mami sayu rasanya menganang mulah nini. sermangatnya kuat, ketabahannya yang sekarang diwarisi oleh babu- seorang ibu dan nenek yang cukup tabah. I really admire them, mami belum tantu macamatu. Malam malam sebelum tidur mesti kami ramai ramai main bunga api. Dulu bunga api mami cap kucing bali arah siung, cina yang menjual kerumah rumah dikampung air pakai perahu merah hehehe. Bila hujan, mesti ia betapuk dibawah rumah kami belindung menunggu habis hujan. Ntah dimana kah siung masani, mungkin sudah tedapat kadai runcit kali. Atutah, alangkah indahnya zaman kanak kanak mami. Kalau boleh mami ulangi semula dan akan lebih berhati hati bila menginjak dewasa,......tapi semuanya ketentuan ilahi. Sudahlah duhai hati. Bebalik kepada bulan kerinduan," eh mami!,..mami!,...nda nampak anak bulan katanya dalam tv".....sibuk adib sama danish membaritau mami hehehe. Perangai mami dari dulu sampai sekarang, bila kedatangan bulan puasa mesti pasang angan angan mesti kurus kan sikit badan kan belawa nanti pakai baju kurung baru. Barutah mami sibuk mencari cream lotion mami yang betimbun bebali nda jua makai. Hehe kan beusai belawa sapu bio-oil ketangan kekaki atleast lambut jua tangan nda kasar besalam. Barutah mami sibuk kan menyambung makan vitamin c n other supplement. Eh masih ada ubat mami ginkgo biloba capsule...lah baik jua balum expired jan, 2011..bah talan sebiji sehari. Eh knapa tah mami nda rajin lagi makan ubat ani?. Dulu setiap kali habis mens, mesti mami tutuk indung kunyit ambil airnya n dicampur diminum dengan air suam. Ajaran petua mulah nini, katanya untuk wujud kan kembali kekuatan badan. Banyak lagi petua kesihatan tubuh badan yang diajarkan mulah nini sebab atu mulah nini dulu cakah, rajin hehe. Dulu sikit2 gatal badan allergic punya pasal pun mengadu arah nini. Sibuk tah nini mengeluarkan arang, sabut piasau, kulit bawang merah yang sudah kering.....bah yati, betangas bekamban tah diberanda tutup lampung...hehe.Tapi banar, dengan kuasa tuhan jua sekajap ilang tia gatal gatal dibadan ah hehe. Now harapkan ubat dari hospital saja palagi mudah bagi mami untuk mendapatkannya...tau apply saja kekulit before sleep. Tapi kesan nya sekajap saja n sure ada side effectnya...nda dapat mengalahkan petua perubatan orang dulu dulu. wallahuaklam...

kedatangan musibah, dukacita dan seumpamanya bukan bererti detik kehancuran dan kedaifan. As we know we learn from mistakes. Dari sana kitani mengetahui tahap kebijaksanaan dan kedaifan diri sendiri. Tanpanya kitani nda kan mengenali erti kehidupan yang sebenarnya. Jadi bersabarlah dan berserahlah pada tuhan. Paling penting, berbaik sangkalah kepada tuhan kerana allah sajalah yang mengetahui segala galanya. Allah tidak akan membebankan sesuatu kepada manusia melainkan sesuai dengan kamampuannya. Pahit hendak ditelan, namun berbanggalah kitani adalah salah seorang pilihannya, kuatkan hati kembalikan semangat kehidupan yang sudah musnah. Disamping itu jangan putus putus berdoa dan berusaha. "janganlah berputus asa dari rahmat allah". Maybe there is something good reason behind it, who knows??. Ingatlah, jika tuhan segera memakbulkan doa hambanya bererti tuhan amat menyayangi kitani. Jika tuhan melambat lambatkan doa hambanya bererti tuhan menguji kitani. Jika doa belum dimakbulkan tuhan bukan bererti tuhan tidak mengasihi kitani, tetapi tuhan 'merancang sesuatu' untuk kitani. Doa adalah senjata bagi orang mukmin. Langit tidak selalunya cerah. Jangan berhenti, teruskanlah berjalan dilandasan yang betul. Insyaallah, kehidupan akan lebih bermakna selepas ini....amin.